GRUP Sif Ekseketiv Menesa bilong Paradise Food Company James Rice i bin sainim Memorandum Of
Understanding (MoU) long Wewak las wik wantaim Food and Agriculture Organisation (FAO) long
strongim wok prodaksen bilong kakao long tupela Sepik provins.
FAO i go pas long “Support to Rural Entreprenuership, Investment and Trade in Papua New Guinea”
(STREIT) program long Is na Wes Sepik Provins and European Union i putim mani long sapotim dispela
wok.
Mista Rice i tok dispela patnasip em bilong kamapim kwantiti na kwaliti long wok kakao na vanila long
Sepik rijon.
Em i tok moa olsem Paradise Food Company i gat plen long mekim soklet bisnis i kamap 20 taim bikpela
moa long PNG. Nau Paradise Food Company i save kamapim 10 tan soklet long wanpela mun wantaim
kakao i kam long 2,000 fama famili. Tasol faktori i laik kamapim 200 tan long olgeta mun na dispela bai i
nidim planti moa fama long wok wantaim bikpela luksave bilong Sepik kakao long PNG.
Stap long dispela seremoni tu em deleget bilong European Union Rene Mally.
Mista Mally i tok em i amamas namba wan hap bilong STREIT projek em i go het nau na tu dispela projek
bai i kamapim planti wok bilong ol yut na ol meri.
Em i tok moa olsem dispela projek i laikim olgeta pipel i mas benefit long en.
Bihain long ol i bin sainim MoU Mista Rice na ol deleget bilong FAO i bin go raun long lukim sampela
kakao blok long Saure na Boikin long Is Sepik Provins.

Jonathan Poema i raitim