LONG Mande 30 Novemba bikpela lonsing bilong kakao projek i kamap long Marangitz ples long Umi-
Atzera LLG long Markham Distrik.

Long makim Gavana Ginson Saonu husat i no bin stap, SME Menesa bilong Morobe Provins Mainue
Fanamu i tok provinsel ekseketiv i apruvim pinis SME Program na ol i redi long lonsim program.
Em i tok olsem aninit long dispela program bai ol i trenim na strongim ol pipel bilong Morobe long go het
wantaim ol SME bilong ol.
Dispela bai inapim driman bilong Gavana Saonu long bildim neks jeneresen bilong ol bisnis man na meri
bilong Morobe Provins.
Mipela i mekim ol wok pinis long inapim wok bilong SME long provins na bilong ol benk long luksave na
patna wantaim ol SME long groim Morobe,” Mista Fanamu i tok.
Dispela ol plen em i sindaun gut wantaim plen bilong nesenel gavman na ol SME long Morobe i ken gat
sans long eksesim ol SME mani long kirapim ol kainkain liklik bisnis.
“Ol kakao groa long Markham bai i stap long praioriti lista bilong kisim fanding long helpim ol long
mekim ol SME bilong ol.
“Mipela i mekim ol plen bilong SME long pusim ol nupela na liklik bisnis long go antap long wanpela mak
we ol benk i ken luksave na ol tu i inapim ol askim bilong benk long kisim dinau. Ol pipel i mas statim
wok pastaim na ol benk na gavman i ken kam na helpim ol long mekim moa,” Fanamu i tok.