LABA Holdings, ambrela lenona kampani bilong impek komyuniti long LNG projek i bin amamas long soim wanpela projek ol i klostu pinisim.

Dispela projek em Komyuniti Risos Senta we ol i bildim wantaim helpim bilong ExxonMobil long mani mak bilong K500,000.

Presiden bilong kampani Raho Kevau i tok ol i amamas long dispela projek long wanem em bai i kamap wanpela hap we olgeta memba bilong komyuniti i ken yusim.

Mista Kevau i tok Laba Holdings i stap 11-pela krismas nau na namba wan wok bilong ol em long painim ol wokmanmeri long wok long LNG projek.

Em i tok long stat bilong projek ol i bin kisim 90 pesen bilong ol wokmanmeri long ol 4-pela impek komyuniti long Lealea, Papa, Boera na Porebada. Arapela 10 pesen bilong wokmanmeri ol i bin kisim long ausait.

Nau konstraksen wok bilong LNG i pinis na planti wokmanmeri i go bek na stap nating long ples. Nau yet Laba Holdings i gat 300 wokmanmeri.

Em i tok tenkyu long ExxonMobil long gutpela sapot bilong ol long ol komyuniti.

Mista Kevau i tok, Laba Holdings i stap pinis na em i mas wok olsem bisnis olsem na ol i lukluk long ol arapela bisnis we ol inap wok long en. Ol i gat bisnis nau long infrastraksa divelopmen, ketering na sekyuriti.

Long wankain taim Laba Holdings i lukluk tu long ol arapela projek long komyuniti long mekim ol pipel i stap bisi na go het yet long mekim mani.

Rosa Koian i raitim