I NO long taim i go pinis PNG Extractive Industries Transparency Initiave (PNGEITI) i bin stap insait long riviu bilong ol projek agrimen bilong Woodlark Mining Projek long Alotau, Milen Be Provins.

Dispela i opim rot bilong en long surukim wok bilong en i go long nupela mak. Pastaim em i wok long sait bilong polisi tasol nau em i suruk i go long prektis tu.

Het bilong Nesenel Sekretariat bilong PNGEITI Lukas Alkan i tok ol i bin stap insait long dispela riviu long lukim olsem ol provisen bilong EITI i go insait long agrimen bilong projek we bai i stap ples klia insait long ol kontrak bilong wok.

Dispela em i kamap lo nau long olgeta memba kantri bilong EITI long bihainim. PNG em i wanpela bilong ol memba,” Mista Alkan i tok.

Insait long wok bilong em long lukim olsem ol peimen long nesenel na provinsal level i bihainim ol EITI standet na rikwaimen, PNGEITI i holim ol woksap wantaim stekolda. Insait long dispela ol woksap ol i toktok tu long pasin bilong ripoting we em i mas tru na i stap ples klia na tu long ol benefit bilong ol ona.

Ol stekolda husat i stap long dispela ol woksap em ol mausman o mausmeri bilong gavman, ekstrektiv indastri na sivil sosaiti.

Insait long dispela bung long Alotau tim bilong gavman husat i bung wantaim Woodlark Mining na lukluk long agrimen bilong ol, i bin wanbel na putim i go insait long agrimen EITI standet na rikwaimen bilong ripoting. Dispela em i namba tu grup long putim dispela tok insait long agrimen. Namba wan grup em K92 Maining long Isten Hailans Provins. 

Mista Alkan i tok olsem PNGEITI i laik wok bung wantaim olgeta maining projek long PNG long kantri long putim EITI standet na rikwaimen bilong ripot i go insait long ol agrimen.

PNGEITI i luksave tu olsem bihain long Alotau ol i gat moa wok long mekim long kamapim moa awenes long EITI.

Rosa Koian i raitim