OL lokal atis long Aalola na Abuari ples long Noten provins nau i ken yusim ol skil na save bilong ol long mekim ol kalsarel samting bilong ples bihain long taim ol i bin kisim prodak divepomen woksap.

Ol dispela henkrap bai helpim ol long kamapim ol liklik wok bisnis bilong ol. Bikos ol i ken salim long ol turis o ol kastoma husat i laikim.

Long dispela woksop, ol 30 manmeri i bin kamap long kisim trening long Alola Treid Senta.

Nau ol i amamas na konfiden long mekim ol hai kwaliti prodak bilong Oro. Kein basket, bilum na karuka mat em sampela bilong ol dispela henkrap prodak we ol pipel i ken mekim na salim.

Janet Lee husat em wanpela bilong ol lain husat i bin kamap long dispela trening bilong prodak divelopmen.

“Long dispela trening mi mekim namba wan mat bilong mi. Mi lainim ol rot bilong mekim kainkain stail na peten long mat, na mi amamas tru bikos nau mi ken mekim planti moa na salim long ol treka na turis husat i save bihainim Kokoda Trek,” Ms Lee i tok.

Olgeta lokal henkrap bai stap long displei long ol treid senta long tripela komyuniti misium long Kokoda Trek.

Prodak Divelopmen Woksap em hap bilong Alola Treid senta program we Kokoda Initiative i sapotim na em i patnasip namel long Nesenel Misium na Art Galeri wantaim Gavman bilong Australia.

Long wankain taim tu dispela woksop i bin givim fainensel litresi trening long strongim ol liklik  bisnis na ikonomik prodaktiviti long Kokoda rijon.

Carolyne Ketsimur i raitim