Ol manmeri bilong Mamaringan ples long Kaiapit long Markham Distrik i amamas na selebret taim bipo memba bilong Markham, Andrew Baing i katim ribon long opim nupela wara saplai bilong ol long Fraide 20 Novemba.

Ol pipel long Mamaringan i save hatwok tru long painim gutpela wara long taim bilong bikpela san na bikpela ren. Tasol dispela hevi i pinis taim ol i bringim wara i kam long ples stret.

Siaman bilong dispela projek, Danny Bayu i tok dispela wara projek i kamap bihainim tingting bilong ol mama long ples. Em i tok ol mama i bung wantaim na soim tingting bilong ol na ol i stat wok na ol man i lukim na helpim ol.

Ol i no kisim helpim long DSIP o PSIP o arapela ejensi long kamapim dispela projek. Ol i makim ol ekseketiv bilong ol yet na ol ekseketiv i wokim fanresing long wokim dispela projek i kamap.

Mista Baing i tok ol pipel i soim stret pasin bilong harim tok na wok bung wantaim long kamapim gutpela sindaun.

“Gutpela save na tingting God i givim yumi pinis. Nau em taim bilong yumi wokim samting i kamap wantaim save na strong yumi gat long en,” Baing i tok.

Ol pipel long arapela komyuniti tu i kamap long dispela kibung na ol i amamas tru long harim gutpela stori bilong dispela projek.

Siaman Danny i tok dispela projek i no pinis yet. Ol bai skruim wok yet inap olgeta komyuniti i stap klostu long Mamaringan bai kisim helpim long dispela wara.

Ezekiel Lawrence i raitim