Niugini Organic Spice (NOS) i nau redi long saplaim Pot Mosbi siti na kantri wantaim ol prodak bilong ol.

NOS em i wanpela liklik prodaksen ogenaisesen long Jiwaka Provins we i save planim na kamapim ol spais olsem, kawawar, rosmeri, lombo, tumerik, kari na ol arapela. Em i bin stat long 2018.

“Mipela i bin stat aninit long wanpela oganaisesen ol i kolim Destiny Foundation. Destiny Foundation em i wanpela ogenaisesen we i save apim self rilaiens. Ol man mas luksave long strong bilong ol na wanem ol i ken mekim. Aninit long dispela, mipela i bin trenim ol manmeri long lukautim pis na kakaruk long ples,” Mathew Ten, Menesa bilong Niugini Organic Spice i tok.            

Bihain long dispela, ol i bin statim praivet ogenaisesen bilong ol long 2018 olsem Niugini Organic Spice na rejistaim dispela ogenaisesen. Bihain long rejistresen ol i baim ol masin bilong wokim ol spais na ol botol bilong pulmapim ol spais i drai long en. Tude maket bilong ol i pikap nau na ol i laik saplaim siti na tu ol narapela hap long kantri.

“Ol manmeri na pikinini husat i gat bikpela weit o bodi i hevi tumas i wok long lusim weit na i go kisim gutpela helt taim ol i stat long putim ol dispela spais insait long kaikai bilong ol na kaikai.

“Na graun we mipela i planim ol dispela spais tu em ogenik o mipela i no putim marasin long en. Olsem na ol dispela spais em ol ogenik stret na i gutpela bilong helt. Mipela i laik strongim ol manmeri long kaikai gutpela kaikai na lukautim helt bilong ol bikos mipela i save olsem helt bilong ol em i welt o gutpela laip bilong ol,” Mathew Ten i tok.

Mathew Ten i gat bikpela driman long NOS long i go bikpela na saplaim wol tu. Nau em i stap long Pot Mosbi long kisim tredmak bilong ol dispela spais prodak bilong en long em i ken stat salim long ovasis.

Rebecca Negere i raitim