PASTAIM trabel man bilong Milen Be Tommy Baker i salim tok long ol pren bilong em olsem em bai givim em yet long han bilong ol polis.

Dispela toktok em pastaim pren bilong Baker husat i bin stap wantaim em na mekim trabel namel long solwara bilong Milen Be i mekim long taim ol i pasim faivpela de woksop bilong Nesenel Yut Divelopmen Atoriti (NYDA) long Alotau.

Man ya, i laikim kolim em yet olsem kossy i tokim dispela bung olsem ol i les pinis long pasin bilong hait na stap na bai ol meri na pikinini bilong ol bai i no inap stap gut.

Kossy na sampela pren bilong em, Distrik kaunsil i bin makim long ol 15-pela yut bilong Milen Be provins long stap long dispela woksop NYDA i ranim aninit long Nesenel Yut Polisi 2020-2030 long helpim ol yangpela man na meri.

Dispela woksop em i bilong lainim ol yet long kisim save long wok ikonomi na sampela sastenabel ektiviti.

Kossy i tok tenkyu long Nesenel gavman wantaim NYDA na distrik kaunsil bilong em long selektim em wantaim ol narapela yut long kam long dispela trening woksap.

Ol narapela 15-pela yut patisipen tu i mekim wankain tok olsem Kossy na ol i tok bai ol i tekpat insait long distrik na provins.

Milen Be Provinsal Edministreta Ashan Numa i bin pasim dispela faivpela de woksap long Alotau na tok amamas long NYDA long luksave log isu bilong ol yut na adresim long level bilong distrik na provins.

“Mipela amamas long NYDA, long karim aut nesenel yut polisi 2020-2030 Plan we i ken helpim planti ol yut,” Numa i tok.

“Provinsal gavman na distrik bai sapotim dispela nesenel yut program aninit long  Nesenel Yut Polisi long givim praioriti i go long ol yut long helpim ol long wok bisnis na ol narapela divelopmen ektiviti insait long provins,” Mista Numa i tok.

NYDA Dairekta Jeneral Joe Itake husat i bin stap long dispela woksap long Alotau i tok astingting bilong nesenel gavman polisi em long engejim ol yut long distrik na provins long ol sastenabel ektiviti.

Itake i tok aninit long Nesenel Yut Polisi 2020-2030 yut stekholda mas wok bung wantaim long sapotim dispela polisi.

NEC i bin endosim Nesenel Yut polisi 2020-2030,  long Epril long dispela yia na risalt bilong dispela polisi em bai NYDA i tokaut taim ol i kondaktim woksap long foapela rijon bilong kantri.

Namba wan i kamap pinis long Alotau long Sauten rijon na woksap bilong ol narapela rijon bai kamap long dispela mun.

Joseph Dawai i raitim