NAU long dispela taim planti yumi i yusim nau dispela tok SME o MSME.

SME long tok Pisin em i Liklik Bisnis. Brukim i go daun moa em i wanpela mak bilong mekim bisnis inap long sampela mani mak.

I gat tupela hap tok insait long SME. Namba wan em ‘smol’ na namba tu em midium. I gat namba tri hap tok yumi lukim long MSME.  

Long dispela wok mak bilong SME bisnis smol em i namel mak we mani mak bilong em i stat long K200,000 (tu handret tausen kina) na inap long K5 milien. Dispela em mani bisnis bilong yu i save mekim long wan wan yia. Insait long liklik bisnis bilong yu, yu ken i gat namel long faiv and 20 wokmanmeri i wok wantaim yu.

Antap long dispela mak em midium entaprais we mani mak dispela bisnis i save mekim long wan wan yia i stat long K5 milien na i go long K10 milien. Dispela sais bisnis i mas i gat namel long 20 na 100 pipel i wok long yu.

 Aninit long K200,00 em maikro entaprais o MSME. Dispela bisnis em i liklik tru na yu ken i gat aninit long 5-pela wokmanmeri i helpim yu.

Em i wanpela rot bilong ol pipel bilong Papua Niugini long go insait long wok bisnis.

Planti pipel husat i mekim liklik wok olsem kakaruk bisnis, tret stua, PMV kar, samapim klos na salim, bekeri  ol salim fres kaikai bilong gaden i fit insait long MSME.

Tasol bihainim trupela pasin bilong mekim bisnis, ol i mas mekim mani na ol i mas wok strong long groim bisnis bilong ol na stap long maket olgeta de.

Planti bisnis i save pundaun bikos ol pipel i save ting ol i gat planti mani na ol i save mekim nabaut long mani ol i mekim.