COVID-19 i bin kamapim bikpela hevi tru long turis bisnis bilong PNG. Dispela i lukim kantri lusim mani mak inap long K70 milien bikos ol intenesenel boda i bin pas.

Turisim, ats na kalsa Minista Walter Schnaubelt i tok turis bisnis i bin kisim bikpela hevi. Bikos ol intenesenel balus na ol hotel i bin pas na no gat turis i bin kam raun long Papua Niugini.

Em i tok moa olsem gavman i wok long traim hat tru long kamapim gut bek ikonomi bilong kantri olsem na i wok long putim mani long Small and Medium Enterprise (SME) bilong karamapim dispela hevi.

“K69.91 milien em mani mak we ol 43 bikpela turis bisnis long PNG i lusim,” Mista Schnaubelt i tok.

Turis em bisnis we i save mekim bikpela mani na tu i save hariap long mekim mani long kantri. Na long wankain taim i save kamapim planti sans wok long ol pipel bilong PNG.