TAIM mi bin lusim ples Kandep long Enga Provins na kam stap long Pot Mosbi  long namba wan taim, mi ting olsem siti laip em bai isi tasol no gat stret.

Em i no olsem ples bai yumi rileks kaikai kaukau na dring fri wara,” wanpela meri Kandep i bin tokim Wantok Niuspepa.

“Mi bin amamas long kam daun lukim Mosbi siti bikos em bikpela hap bilong olgeta sitisen long kam raun lukim na go bek long ples tasol mi lukim hatwok laip long stap long siti,” em i tok.

“Mi bin stap nating inap mi painim wanpela mani na stat maketim buai na smok bilong mi long tebol i kam inap nau,” em i tok.

Em i tok dispela liklik maket i save sapotim siti laip bilong em wantaim ol famili.

“Mi statim maket tebol bilong mi wantaim buai na smok bikos tupela em isi rot bilong kisim mani olgeta de,” em i tok.

Dispela liklik tebol maket bilong mi i kisim mi go long narapela mak. Na dispela mak em bilong stat salim dinau mani long ol kastoma lain we mi save long ol pinis.

“Mi lukim mani olgeta de na tingting bilong go bek long ples Kandep em ranawe, olsem na mi stap yet tasol mi save tingim ol lain long ples na salim mani bilong ol na helpim ol pikinini long hap skul fi,” em i tok.

“Siti em gutpela hap bilong wokim mani long maket bikos bai yu gat planti kastoma na pren wantaim we yumi ken serim bisnis wantaim o sapotim narapela,” em i tok.

Bikpela tingting bilong mi em long maket na sapotim famili bilong mi long siti na ples wantaim.

Jacklyn Kimala i raitim