LAS wik Trinde Nesenel Stetistik Opis (NSO) i putim aut ripot bilong en long Nesenel Gros Domestik Prodak (GDP)) bilong 2018.

Dispela ripot i soim olsem long mak bilong karen prais ikonomi bilong Papua Niugini i bin gro na sais bilong en i stap long mak bilong K79.4 bilien. Em i soim olsem ikonomi i bin gro long mak bilong K6.9 bilien na abrusim mak bilong 2017.

Dispela gro bilong ikonomi i kam long sekta bilong maining na kwari.

Long mak bilong konstan prais ikonomi i bin pundaun liklik tasol. Ekting Nesnel Stetisen John Igitoi i tok dispela pundaun em bikos long bikpela guria i bin kamap na i bagarapim ran bilong ikonomi long liklik taim.

Mista Igitoi i tok tu olsem long putim aut ripot bilong GDP em i makim wanpela bikpela win.

“Em i no isi long kisim data na stretim na putim i go long wanpela ripot tasol dispela em i wanpela bikpela wok mak we NSO i winim,” Mista Igitoi i tok.

Stap long dispela bung tu em Vais Minista bilong Nesenel Plening Dokta Kobby Bomareo PHD . Em i tok “stetistiks i save soim olsem ol samting i go gut o nogat.

“Em i soim helt bilong ikonomi bilong yumi na em i kontribiut long tripela bikpela samting long Human Divelopmen Index (HDI) bilong yumi. Ol tripela em longpela na helti laip, save na gutpela sindaun.

“Stetistiks em i impoten na wok em long yusim dispela infomesen long mekim ol plen we inap wok, Dokta Bomareo i tok.

Rosa Koian i raitim