OL fama nau i gat sans long apim prodaksen bilong kakao na tu ol nupela fama i mas stat long saplaim moa kakao.

Sif Ekseketiv Opisa bilong Paradise Foods Ltd i tok kampani bai mekim nupela kwin Emma soklet faktori we i napim mani mak olsem K55 milien.

Dispela nupela faktori bai stap long Lae na bai kamapim 75 wok na tu bai sapotim ol kakao fama. Tasol moa wok i stap ol kakao fam we olgeta famili memba i stap insait long en.

“Mi laik kamapim planti wok opotuniti. Mipela i kisim planti toktok i kam long planti rijon olsem ol  fama i laik planim moa kakao bikos em i gutpela mani bilong ol. Olsem na neks yia mipela bai mekim nupela faktori we i bikpela moa long faktori nau i stap long Pot Mosbi,” Mista Rice i tok.

Faktori long Mosbi i save mekim 10 tan long wanpela mun. Nupela faktori we Paradise Foods Ltd i laik bildim bai mekim 200 tan long wanpela mun.

Dispela em gutpela nius long ol kakao fama. Nau ol i ken salim kakao bilong ol long gutpela prais.

Na long wankain taim tu, dispela projek bai kontribiut gut i go long ikonomi bilong PNG. Planti kastoma nau i laikim tru ol prodak bilong Paradise Foods Ltd, moa yet em soklet we ol i mekim long lokal kakao bilong yumi yet ol PNG.