KRISMAS na Niuyia  i kamap klostu na em taim planti manmeri na pikinini bai kalap i go i kam long balus.

Long dispela taim tu Air Niugini i givim toksave i go long pablik  olsem em i tambu tru long karim paia kreka insait long balus long taim yu trevol.

Paia kreka em i eksplosiv na i ken kamapim birua bikos em i save kamapim paia,  na i ken kamapim dai, olsem na Air Niugini i putim strongpela tok nogat long karim insait long bek o kago taim ol pasindia i kalap long balus.

Air Niugini bai sekim olgeta kago bilong ol pasindia husat i kam long boda taun long Vanimo, Wewak, Madang na Lae.

Paia kreka i no seif long karim insait long balus na i stap long lo bilong Sivil Eviasen Ekt (2000). Pasindia husat i karim paia kreka long kago i ken kalabus long 7-pela yia.

Air Niugini i toksave olsem ol sekyuriti bai sekim ol kago long olgeta ples balus, na sapos ol i painim paia kreka long kago ol bai givim long polis.