OL wokmanmeri na papagraun bilong Pogera i laik save long wanem taim bai gavman i opim main gen.

Presiden bilong Pogera wok yunien Dassil Mangapen i tok ol i laikim Praim Minista James Marape bung wantaim Nesenel Gavman long tokim ol long wanem taim stret bai ol opim main.

Pogera maining woka yunien wantaim 2,692 membasip wokmanmeri bilong gol main i bin holim wanpela bung wantim PNG Treid  Yunien Kongress long Pot Mosbi na tokaut long dispela wari bilong ol.

“Mipela woklain bilong Pogera Gol main i kisim bikpela bagarap long wet longpela taim long taim main i pas na mipela i laikim gavman long tokim mipela long wanem samting tru ol i wokim nau.

“Gavman i promis long baim kompensesen na mipela i bin putim sabmisin bihainim toktok bilong ol, tasol i kam inap nau mipela i no harim wanpela toktok long ol yet,” Mangapen i tok

Pogera yunien bilong ol wokmanmeri i tok olsem sampela woklain i widro long Nasfund seviings na ol narapela sevings taim main i bin pas long Epril long dispela yia we i soim wanem samting ol employis i wok long mekim stap.

Ol ekseketiv bilong yunien it ok wanbel bilong ol wantaim gavman bai pinis nau.

“Mipela laikim Praim Minista James Marape na gavman bilong em long mekim promis bilong em i kamap tru long mipela ol woka na Los bilong Pogera we em PM James Marape i bin tok bai em i sapotim long kompensetim mipela,” Yunien i tok.

PNG Treid Yunien Kongres i sapotim ol na i askim gavman long wanem as na em i wok long mekim ol woka long wet longpela taim i stap?

Joseph Dawai i raitim