KINA benk i bin holim wanpela bung bilong ol kastoma bilong em long Fraide las wik long Pot Mosbi Golp klab.

Long dispela bung, Chef Julz Henau husat i papa bilong bisnis “The Healthy Food Company” i bin stap na mekim ol kainkain kuk bilong em.

Treseri na Fainensel Maket tim bilong Kina Benk i bin holim dispela koktel pati olsem sans bilong ol klaen long stat wokbung bek wantaim wanpela arapela bihain long COVID-19 lokdaun.

Long taim em i givim toktok bilong em, Siaman Isikeli Taureka i tokaut long sampela gutpela samting we Benk i kisim long dispela yia, na tu ol toktok bilong ASX na PNGX.

“Benk i gro kwiktaim tru insait long 5-pela yia na i luk olsem bai kamap namba tu benking indastri long kantri,” Mista Taureka i tok.

“Mipela i laik go het long gro inap mipela i ken lukautim mani bilong ol bikpela kopret na bisnis,” em i tok.

Olsem bren embaseda bilong Kina Benk, Chef Julz i soim gutpela stail bilong em long kuk long dispela pati. Em i kukim ol naispela kaikai bilong PNG na ol kastoma i amamas long kaikai.

“Mi laikim tumas ol kaikai bilong PNG. Mi amamas long kukim na stailim olsem moden stail kaikai. I bin gat planti salens long dispela yia, tasol dispela patnasip wantaim Kina Benk i helpim mi long kirapim bek bisnis bilong mi,” em i tok.

Tresera bilong Kina Benk Nathan Wingti i tok Kina Benk i amamas long ol patnasip bilong em wantaim ol bren embaseda husat i soim olsem ol i strongpela lokal SME long PNG. Mipela i amamas long holim dispela iven long helpim “The healthy food company” soim talen bilong Chef Julz.

Bikpela tok tenkyu i go long ol klaen husat i save sapotim Kina Benk. Benk bai soim tu ol arapela bren embaseda bilong em long ol taim i kam.

Carolyne Ketsimur i raitim