LAS wik CEFI i bin bung wantaim ol mausman bilong Bank of Papua Niugini (BPNG), Insurance Woking Grup, Insurens Komisin long opim awenes bilong Insurens long PNG.

Insurens em sekyuriti bilong wan wan manmeri, pikinini, propeti o aset. Em bilong lukautim yu yet long taim yu bungim hevi.

Dispela kempein bilong insurens em i impoten tru long laip bilong ol pipel long PNG. Olsem na CEFI wantaim sapot bilong BPNG, Insurens Woking Grup, Insurens Komisin i redi long karim aut dispela awenes long ol pipel.

“Olgeta pipel bilong PNG i mas insuarim ol yet. Olsem na awenes i mas go long olgeta hap,” Mausman bilong Insurens Woking Grup, Raka Taviri i tok long taim bilong opim awenes.

Em i hat tru long traim long skulim ol pipel long kisim moa save long Insurens polisi, bikos 87 pesen bilong ol pipel i stap long rurel eria.

Awenes bai go isi isi yusim Facebook na ol narapela midia.

Long PNG, 2 pesen bilong populesen tasol i gat inurens na dispela em i daunbilo.

Gavana bilong BPNG na Siaman bilong CEFI, Loi M Bakani i tok BPNG bai go het long wokbung wantaim Insurens Woking Grup long karimaut dispela awanes na strongim ol pipel long inves long insurens.

Long PNG, ol pipel i save dipen long wantok sistem. Taim wanpela man o meri i marit, ol famili i save bungim han long helpim em. Tasol sapos ol famili o wantok i no helpim, em bai hat tru.

Olsem na insurens em i impoten. Taim yu inves long insurens, yu no i nap nidim helpim bilong ol wantok.

Carolyne Ketsimur i raitim