Long Mande 2 Novemba 2020, Memba bilong Pot Mosbi Not Is John Kaupa wantaim PM James Marape na ol arapela lida bilong Gavman na ol patna i bin amamas long opim Micro Small Medium Enterprise (MSME) program long Sir John Guise Stadium.

Moa long 2000 meri wantaim sapot bilong ol man na pikinini i bin kamap long dispela lonsing. Em i bikpela de we olgeta manmeri i bin amamas long witnesim.

Ol mama i bin bilas nais tru na kam long ol grup bilong ol. Rekot i soim olsem 290 grup o asosiesin bilong ol meri i bin kamap long witnesim dispela lonsing.

Wantaim K200 milien we gavman i bin givim long ol SME bisnis, dispela lonsing i opim dua bilong ol mama long stat mekim ol liklik SME bilong ol.

Mary Markus i gat 45 krimas na em i bilong Madang, tasol em i stap long Mosbi moa long 20 krismas. Em wanpela mama husat i go pas long 6mail DCA Womens Asosiesen. Mary i tok em na grup bilong em i amamas tru long lukim dispela bikpela wok we John Kaupa na gavman i mekim long helpim ol mama.

“Grup bilong mipela i gat planti mama husat i no gat man bilong ol. Sampela i dai, sampela i lusim ol meri na sampela ol disebol. Mipela i amamas olsem gavman i luksave long mipela na i givim bikpela sapot long mipela ol mama. Nau mipela i ken mekim ol liklik bisnis na lukautim ol famili bilong mipela,” Mary i tok.

Mary wantaim sapot bilong ol mama long asosiesen bilong em i tok dispela SME program em i gutpela sans bilong ol lain husat i nogat wok o bisnis. Ol i tok strong olsem , ol lain husat i gat bikpela bisnis pinis mas givim sans long lain we i nogat yet.

Em i tok tu olsem grup bilong em i bin painim hat tru long taim bilong rejistresen. Olsem lida bilong grup, em i bin bungim planti salens tru. Tasol grup i amamas olsem dispela hatwok bilong ol i redi long karim kaikai.

Bihain long dispela lonsing, olgeta meri bai kisim Fainensel Literesi Kos long bisnis bikos em i wanpela rikwaimen bilong mekim SME.

“Mi tok tenkyu long PM Marape long luksave bilong em na i givim K200 milien long SME. Dispela em i namba wan rot long kisim bek PNG. Na tude ol mama i soim olsem ol i redi na siries long kisim bek PNG. Infomal sekta bai kontribiut long divelopim ikonomi bilong PNG,” Mista Kaupa i tok.

Carolyne Ketsimur i raitim