MANMERI i mas mekim moa wok didiman long strongim ol yet, Isten Hailans Gavana Peter Numu i tok.

Em i tok tu olsem ol i mas kaikai moa gaden kaikai long stap helti.

Em i mekim dispela tok long taim Isten Hailans Provinsal Gavman wantaim ol stekholda i opim Agro Invesmen Projek long Goroka las wik.

Em i tok planti manmeri nau i senisim laipstail long pasin ol i stap na kisim kaikai.

Numu i tok mani i stap tasol manmeri yet i mas wok long ol i ken kamapim mani.

Em i tok gavman bilong em i luksave olsem planim na kamapim rais i wanpela wok em planti manmeri i wok long mekim nau.

“Ol manmeri na pikinini i lusim pasin bilong wok gaden na nau i kaikai rais,” Numu i tok.

“Tasol ol i mas gat save bilong planim na kamapim rais olsem ol i ken kisim olgeta gutpela samting rais inap givim.

“Ol i ken kaikai rais long sapotim ol yet tasol ol inap salim rais tu long kisim mani.”

Numu i no amamas olsem planti rais ol manmeri i kisim i kam long ol arapela kantri.”

Em i tok dispela i no gutpela long wanem kantri i gat gutpela graun long planim na kamapim rais.

Em i tok gavman bilong em bai painim ol rot long trenim ol manmeri olsem ol i gat save long lukautim rais na kisim gutpela samting long em.

“Taim yumi mekim olsem, yumi bai strongim lokal ikonomi tu,” Numu i tok.

“Gavman bilong mi i kamapim pinis plen long kamapim wanpela rais kampani long provins.

“Kampani bai helpim long trenim ol manmeri long planim rais tasol long wankain taim bai trenim ol long lukautim na salim rais.

“Provins inap long kamapim gutpela mani sapos em i salim rais.”

Numu i tok provinsal gavman i luksave long 6-pela lokal rais fama na i helpim na sapotim wan wan bilong ol long K50,000 long ol i karimaut rais projek.

Kampani provinsal gavman i laik kamapim em Eastern Highlands Holdings Ltd.

Sape Metta i raitim