FRES produs indastri long Papua Niugini i gat sans long mekim K34 bilien long wan wan yia, wanpela saveman bilong wok egrikalsa wantaim Fresh Produce Development Agency (FPDA) James Aniau i tokim ol pipel bilong Gumine.

Mista Aniau i mekim dispela tok taim em i givim wanpela 3-pela de trening wantaim ol fama long ples Oreme, long Dirima, Simbu Provins.

Em i tok PNG i ken mekim K34 bilien long fres produs sapos olgeta pipel stat long ol fama i go inap long maket i mekim olgeta samting stret.

Diman bilong balb anian long kantri long wan wan yia em K10-K12 milien. Long yia 2005 kantri i bin bringim i kam balb anian long ovasis long mak bilong K4-K5 milien na long 2019 kantri i baim moa balb anian long ovasis long mak bilong K5-K12 milien,” Mista Aniau i tok.

Em i tok wanbel namel long tupela patna, Simbu Provinsal Gavman na FPDA i stap pinis long mekim wok kamap aninit long Market for Village Farmers (MVF). Dispela K171 milien MVF projek we International Fund forAgriculture (IFAD) i putim sampela mani tu i lukluk long wok bung wantaim sikispela provins na Simbu em i wanpela bilong ol.

Dispela projek i laik wok wantaim ol fama long groim planti kwaliti produs we ol maket i laikim. FPDA i traim dispela projek pinis wantaim ol fama long Gembogl na i lukim balb anian long dispela hap i bin mekim K2-K5 milien long wanpela yia.

“Gembogl i gat sans long mekim mani long balb anian na wankain long Gumine. MP bilong yu Nick Kuman i sapotim balb anian na potato faming na dispela e mi gutpela tru,” Aniau i tok.

Ol fama i gat graun na taim na FPDA i amamas long ranim ol trening long helpim ol pipel kisim moa save long groim ol kwaliti produs na wantaim sapot bilong distrik na provinsel edministresen ol i ken painim maket bilong longpela taim.

Long dispela taim tu FPDA opis long Kundiawa i givim ol sid na ol tul bilong wok long mak bilong K40,000 long Mary Immaculate Girls Technical Secondary School long Dirima.

Stori i kam long Wright Media