STOUT, em i wanpela kar we Toyota kampani bilong Japan i wokim na klostu 20 yia i go pinis kampani i rausim Stout long maket.

Tasol ol pipel bilong Gumine insait long Simbu i laikim tumas Stout long wanem dispela kar, maski Gumine rot i hat long ran, i save givim gutpela sevis long manmeri.

Long 1990s i kam nau Gumine i gat 10-pela Toyota Stout i wok long ran i go kam long Gumine-Kundiawa rot long givim sevis long ol pipel.

I no long taim i go pinis ol pipel long Gumine i amamas taim wanpela bilong dispela ol olpela Stout i ran go long distrik. Dispela Stout em Samson Mekanik i draiv long Kumbagl long boda bilong Jiwaka na Simbu na i go long Gumine.

Samson i go long amamas wantaim ol pipel long lukim Praim Minista James Marape na lokal Gumine Memba Nick Kuman i raun long distrik.

Samson i tok wantaim Stout, em inap go long ples na amamas long bungim ol pipel na lukim ol lida i raun.

Em i tok ol olpela model kar i strong na i gutpela na kar bilong em i stap moa long 30 yia olgeta.

Em i tok tu olsem wantaim dispela em bikos em yet i mekanik na em i save long stretim kar taim kar i bungim hevi o i bagarap.

Dispela kar i helpim em gut long mekim ol wok na we rot i hat, Stout bilong em inap kisim em i go.

Ennio Kuble i raitim