MISSIONARY Aviation Fellowship (MAF), balus kampani bilong ol misineri we i save wok long rurel ples balus i givim gutpela sevis long ol manmeri.

Mausmeri bilong kampani, Mandy Glass i tok namba wan luksave na tingting bilong MAF em bilong helpim ol komyuniti husat i save lukautim gut ol ples balus.

Kampani bai i no inap tingim tumas ol komyuniti husat i no save lukautim ples balus gut na i no save givim gutpela ripot kain de bai kamap (weather) na givim ripot long taim stret.

MAF insait long PNG i laik wok bung wantaim olgeta komyuniti na givim gutpela helpim long ol.

“Mipela i laikim tru olsem yupela yet i mas go pas long klinim na lukautim ples balus bilong yupela,” Glass i tok.

“Toktok wantaim MAF na givim ol toksave MAF i laikim long em.

“Taim yupela i no givim ol dispela toksave, em bai hat tru long MAF long givim gutpela sevis na helpim komyuniti bilong yupela.”

Glass i tok sampela komyuniti i gat ol HF redio na ol i mas helpim long givim stretpela weda

ripot long taim stret olsem MAF balus i ken save long ran bilong em.

Em i tok MAF balus i save ran na givim sevis long planti rurel balus long kantri.

Sampela ol ples em MAF i save ran ol em Ambunti, Malaumanda, Samban, Tamo, Wewak, Wuvulu, Yambaitok long Is Sepik Provins; Aiyura, Goroka, Guwasa, Marawaka, Owena, Simogu, Sindeni (Isten Hailans); Kairik, Kompiam, Maramuni, Pyarulama, Yenkisa (Enga); Kerema, Wabo (Galp); Tari, Wanikipa (Hela); Konambe, Tsendiap (Jiwaka); Madang, Simbai (Madang); Finschhafen, Gusap, Nadzab, Sapmanga, Wasu (Morobe) Pot Mosbi (NCD); Anguganak, Buluwo, Edwaki, Eliptamin, Green River, Lumi, Munbil, Nuku, Oksapmin, Sisamin, Tadji, Tekin, Telefomin, Tumolbil, Vanimo (Sandaun); Kundiawa, Karimui, Manu (Simbu); Muluma (Sauten Hailans); Balimo, Bensbach, Daru, Depepari, Dodomona, Fuma, Hesalibi, Honinabi, Kapal, Kawito, Kiunga, Morehead, Mougulu, Nomad River, Rumginae, Sasereme, Suabi, Suki, Tabubil, Tapila, Wawoi Falls, Wipim (Westen) na Kagamuga (Westen Hailans).