LONG taim em i givim tok amamas bilong em long PM Marape long lonsim K65 milien divelopmen projek long Isten Hailans Provins, Minista bilong Maining Johnson Tuke i bin tokaut olsem, em i laik bai gavman na Isten Hailans Provinsal gavman i mas  tingting long stretim Ramu 2 Haidro projek.

“Ramu 2 em i bikpela projek we  olgeta pipel bilong Isten Hailans na Papua Niugini bai i benefit long em,” Mista Tuke i tok.

Em i tok bihain long APEC miting long 2018, gavman bilong PNG i bin singautim olgeta patna bilong pawa long rijon long kamapim gut pawa long kantri, tasol i kam inap nau, 13 pesen bilong PNG tasol i gat ekses long pawa saplai.

“Gavman i bin singautim Australia, Japan, Nu Silan na United States of America long wokbung wantaim na helpim long bringim pawa long 70 pesen bilong ol pipel,” em i tok.

Ilektrisiti or pawa em i impoten samting long kantri. PNG i nidim pawa long ranim ol bisnis na impruvim ikonomi bilong kantri.

“Mi askim strong PM Marape long putim tingting  long dispela projek. Dispela projek bai mekim mani na  kamapim planti wok opotuniti,”

Em i singaut tu i go long Isten Hailans Gavana Peter Numu na Morobe Gavana Ginson Saonu long sapotim toktok bilong em bai gavman i ken luksave long dispela projek.

Minista Tuke i tok em i amamas long wok bilong  Marape-Basil gavman na em bai go het long wok wantaim ol long ol projek we bai sindaunim gut ol pipel bilong PNG.

Long wankain taim, Mista Tuke i givim tok amamas bilong em i go long nupela memba bilong Goroka Aiye Tambua.

“Olgeta lida bilong Isten Hailans bai wokbung wantaim na sapotim gavman long bringim gutpela sevis long kantri,” em i tok.

Carolyne Ketsimur i raitim