“Olsem mausman bilong Oposisen Plening na bipo Minista bilong Nesenel Plening na Monitaring, mi wari tru taim gavman i no fandim nupela intanesenel bris long Wewak na Vanimo,”

Richard Maru i mekim dispela tok long autim bel hevi bilong em na long wankain taim em i askim strong gen gavman long hariap na fandim dispela projek.

Em i tok, dispela projek i bin kamap namba wan praioriti long Divelopmen plen namba tri.

Konstraksen bilong ol dispela intenesenel bris em i gutpela sans bilong PNG long divelopim treid wantaim Indonesia.

Indonesia em i namba seven kantri long wol wantaim bikpela ikonomi level, wantaim GDP mak long 1.1 trilion US Dollar. Na populesen namba em 270 milien we i mekim kantri kamap namba foa bikpela populesen long wol.

Wantaim dispela namba, PNG i gat gutpela sans long kamap poroman wantaim Indonesia long pasin bilong treidim samting go kam.

Bikos long bikpela populesen bilong Indonesia,  kantri bai nidim moa kaikai bilong fidim ol pipel. Olsem na PNG bai gat bikpela sans long divelopim Sepik na planim o lukautim ol kaikai olsem rais, vanila, kakao, welpam, sipsip, kakaruk, bulmakau na moa na salim long Indonesia.

Gavman i mas lukluk gut na statim konstraksen bilong dispela tupela bris. Olgeta wok redi bilong dispela projek i bin kamap long taim bilong O’Neill-Abel gavman. Ol i bin yusim K15 milien long mekim ol  stadi i soim olsem dispela tupela bris bai kontribiut i go long ikonomi bilong PNG.

Tasol taim gavman i bin senis, no gat wok i kamap yet long go hetim konstraksen. Olsem na Mista Maru i askim PM Marape long painim rot bilong kisim mani bilong fandim dispela projek.

Indonesia i gat planti kwaliti prodak em i salim long daun prais. Na dispela em i gutpela sans bilong PNG long baim ol dispela prodak na inap long tromoi mani long ol rabis prodak bilong ol China.