OL Small and Medium Enterprise (SME) i painim hat yet long kisim dinau long ol benk bikos long kainkain lo na askim bilong ol i hat tumas.

Taim polisi bilong SME i bin kamap long 2016, kantri i bin gat bilip olsem, dispela polisi bai bringim planti sans long kamapim planti wok we i ken helpim long kontribiut i go long ikonomi bilong PNG.

Tasol bikos long ol hevi olsem, sas bilong dinau, pipel i no trastim benk, na kainkain lo na askim bilong aplikesen long kisim dinau na moa i mekim na ol SME i no amamas long kisim dinau long ol benk na go hetim wok bilong mekim bisnis long kantri.

Wanpela risets bilong PNG Nesenel Risets Institiut (PNG NRI) risets we i tok, “Gavman i mas rausim ol hatpela lo i pasim ol SME long eksesim dinau long benk,”, Wendy Morona wanpela Kadet Risets Opisa na Dokta Francis Odhuno Program Lida it ok olsem, ol SME i painim hat long kisim dinau long benk.

Ol SME i nidim isi ekses long kisim dinau na go het long mekim ol bisnis bilong ol. Bikos ol dispela bisnis tu bai kamapim planti wok opotuniti na kontribiut long ikonomi bilong PNG.

Ol dispela risets opisa bilong PNG NARI i toktok strong long gavman i mas luksave long dispela hevi na skelim ol dispela lo.

Em i gutpela gavman i wok long fandim ol SME tasol bai gutpela moa sapos em i helpim ol  tu long rot bilong kisim dispela mani  long mekim ol liklik bisnis.

Planti ol lain husat i stap long rurel eria tu i  gat laik long eksesim dispela mani we gavman i givim bilong helpim ol SME, tasol bikos long kainkain lo na askim bilong ol benk na planti bai painim hat long kisim dinau.

Carolyne Ketsimur i raitim