BIKPELA laik bilong ol manmeri long Gumini distrik long Simbu long kamapim wok poteto na balb anian i laikim sapot long ol lida long lukim dispela wok i mas kamap, wanpela opisa bilong Fres Produs Divelopmen Ejensi (FPDA) i tok.

FPDA poteto speselis na Maket bilong Viles Fama (MVF) Simbu Kodineta David Kaupa i mekim dispela tok taim em bin lukim planti manmeri na ol yangpela pipel long ples Boromil, Yani, Dirima na Gumini i kisim trening long planim na lukautim poteto na balb anian.

Em i tok bikpela wok nau i stap wantaim ol kaunsila bilong ol 45 wod bilong tripela lokal level gavman em Gumini, Digine, na Kumai-Bomai.

Em i askim ol long putim sampela mani bilong liklik i go long namel sais bisnis (SME)  sekta em K5.4 milien olsem ol fama i ken yusim long kamapim ol wok.

As tingting bilong FPDA em long skulim na promotim poteto na balb anian we i gat gutpela maket bilong em.

Dispela tingting em Memba bilong Gumini Nick Kuman i kamapim we Memorandum bilong Agrimen (MoA) i kamap pinis wantaim mani long sapotim 10-pela kontek fama.

“Mi laik ol lida bilong Gumini i ken sapotim ol yangpela husat i gat laik wok,” Kaupa i tok.

“Dispela wok i kamap long rait taim we mipela ol FPDA wantaim ol patna i redi pinis long kamapim wok i go na ol fama tu i laik kamapim.

“Mi laik askim ol kaunsila long sapotim ol fama bilong ol.”

Wanpela tisa bilong Dirima, Lukas Yuan i tok ol kaunsila i ken putim sampela SME mani long FPDA long sapotim ol fama wantaim poteto sid, balb anian sid, ol tul, marasin na ol narapela samting bilong wok.

Mista Yuan i tok SME mani i ken i go long ol wok bilong fama long kamapim moa mani long go insait long famili na distrik.

Susana Elwai, wanpela meri fama i tok em i bin kisim trening pinis we dispela inap long holim graun long kamapim poteto na bal anian, tasol em i nidim sid na ol narapela samting bilong wok long graun bilong en.

Wod 9 kaunsila bilong Gumini LLG Yobale Talba husat i kisim trening long Dirima, i tok em i amamas long skul long save long groim poteto na balb anian.

Mista Talba i tok em bai givim sampela mani bilong SME i go long helpim ol fama long lain bilong em long Mina klen, Kaleku.

Ennio Kuble i raitim