AILAN Rijinol senta long Kerevat, Is Nu Briten i bin amamas long kisim tupela grup we i bin visitim ol.

Long 22 Julai, wanpela grup bilong ol meri long “Mama Lus Fruit Skim” long Hoskins Smallholda projek long Kimbe i bin namba wan long visitim senta.

Ol dispela meri i amamas tru long lukim na save long hau ol i save prosesim galip nat long faktori.

Faktori long Kerevat i baim galip nat long K1.50 long wanpela kilo. Bihain ol i prosesim na pekim na salim i go long Mosbi long namba wan ritela City Pharmacy Ltd husat i save salim ol galip nat prodak.

Dispela grup i save planim welpam long Wes Nu Briten na ol i gat bikpela laik long kamapim gut sindaun bilong ol long ples. Olsem na ol i gat intres long save moa gut long galip nat divelopmen.

Narapela visit i bin kam long Nu Silan Hai Komisina, Philip Taula long 25 Julai.

Mista Taula i bin go wantaim Minista bilong Hausing na Eben Divelopmen  Justin Tkatchenko, Minista bilong Sivil Aviesen na Gazelle MP Jelta Wong na Minista bilong Lands na Lae MP John Rosso.

Dispela visit em hap bilong 4-pela de visit bilong Mista Taula long Is Nu Briten.

Bihain long dispela visit, Mista Tkatchenko i tok gavman na ol pipel i mas sapotim galip indastri bikos em i gat ol gutpela prodak.

Hai Komisina Taula na Mista Tkatchenko i tok i mas gat invesmen long dispela faktori na tok amamas long NARI long mekim gutpela wok long divelopim dispela indastri.