MEMBA bilong Gumine Nick Kuman i laik bai K5.4 milien bilong liklik i go long namel sais bisnis (SME) mani i mas sapotim wok bilong groim kumu long distrik na salim i goaut long ol arapela senta long kantri.

Kuman, husat i memba bilong Gumini long tripela tem bilong Palamen na nau yet i Minista bilong Haia Edukesen, Risets, Saiens na Teknoloji.

Em i tok balb anian, poteto, na kaukau i gat bikpela maket we ol fama i ken kisim gutpela mani long em.

Em i tok ol kaunsila i ken yusim mani bilong SME long sapotim ol fama long kamapim poteto na balb anian wantaim kaukau insait long distrik.

Em i tok distrik bai sapotim ol fama bilong kaukau wantaim 1,000,000 sid kaukau long ol fama i ken kisim na planim.

Mista Kuman i mekim dispela tok bihain long of Fres Produs Developmen Ejensi (FPDA) i kamapim patnasip wantaim provinsinal gavman long kirapim wok wantaim ol fama long kamapim balb anian na poteto insait long 6-pela distrik long Simbu Provins.

SME mani em tripela lokal level gavman insait long Gumini distrik i kisim pinis, em ol mani bilong 2019 na 2020 we Kuman i laik ol 45 wod kaunsila i ken yusim long sapotim ol fama long distrik.

Memba i amamas na tok tenkyu long FPDA long kamapim opis long Simbu na tu long i go pas long kirapim wok bilong Maket bilong Viles Fama (MVF) projek we Gumine distrik i wanpela patna insait long MVF.

Em i tok Gumini Distrik Developmen Atoriti (GDDA) i bin givim pinis K100,000 i go long FPDA bilong yusim long stat wok long kirapim wok bilong planim balb anian na poteto wantaim ol fama insait long distrik.

Kuman i laik bai ol wod kaunsila i givim sampela SME mani i go long sapotim ol fama long wod bilong ol long baim sid poteto na balb anian wantaim ol samting bilong wok long fam.

Em i tok GDDA i kamapim wok pinis long ol fida rot bilong distrik na tu wok long bikpela rot olsem ol fama i ken salim ol samting ol i groim.

Ennio Kuble i raitim