WABAG Maket Divelopmen Projek bai go het bihain long Australia Aid i bin givim K13 milien wantaim helpim bilong Minista bilong Fiseris, Marine Risos na Wabag Open Memba Dokta Lino Tom.

Dispela Maket projek seremoni  bilong brukim graun i bin kamap long Februeri long dispela yia.

Memba bilong Wabag Dokta Lino Tom i tok Coffey Intenesenel Divelopmen Pty Limited em menesing kontrakta bilong ol Insentiv Fund Phase 4 (IF4) Program olsem na i makim maus bilong Autralia Gavman Dipatmen bilong Foren Afes na Tred (DFAT) long menesim dispela bikpela projek.

Dr Tom i tok gutpela wok bilong dispela projek  i bin kamap long las tupela wik i go pinis wantaim ol kampani.

Ol pipel bilong Wabag Open Ilektoret na olgeta hap bilong Enga Provins i no gat gutpela maket kam inap nau. Olsem na dispela projek i ken helpim ol lokal Enga pipel long sindaun gut na maket.

Dokta Lino Tom i bin tokim ol pipel olsem Coffey Intenesenel Divelopmen Pty Limited em i wanpela independen kampani husat bai go pas long lukautim dispela projek na bai no gat wanpela politikal hevi o kontrol long dispela projek.

“Mi bin tokaut pinis long wok bilong dispela projek taim mani i bin kam stap na redi long yusim. Mi save plenim pastaim, painim mani long nesenel na intenesenel wantaim em wok bilong mi,” Minista Tom i tok.

Minista Tom i bin mekim dispela toktok long taim em i bin go lukim 3-pela komyuniti projek long Lenk ples ausait long Wabag Taun long Mande 26 Oktoba 2020.