RIGO Distrik bai kisim pawa long mani mak olsem K20 milien na gavman bilong Niu Silan i givim dispela mani.

Awenes bilong toksave long ol pipel long dispela divelopmen i bin kamap long Fraide 11, Septemba 2020 long Hula na Kaparoko.

Insait long Rigo distrik, ol 16-pela ples bai kisim pawa.

PNG Power Limited (PPL) bai mekim dispela projek wantaim  Rurel On-grid Electrification Program (ROGEP) we i go wantaim 2030 visen bilong Nesenel Gavman bilong rurel ilektrifikesen.

Projek bai wok long 3-pela hap. Namba wan hap em konstraksen na wok bilong pulim pawa lain long Galomarubu Riwali janksen na i go olsem long Hula.

Namba tu hap bai ol pawa lain i go long ol wan wan ples na namba tri hap bai olgeta haus i kisim pawa saplai.

Lokal Memba Lekwa Gure i tok dispela em gutpela  sans bilong ol pipel long Rigo.

PPL wantaim diveloping patna i redi long statim wok nau na askim i go long komyuniti long sapotim ol na wokbung wantaim ol long  projek i go het.

Mista Gure i tok tenkyu tu long memba bipo Anderson Vele long kontribiusen bilong em long dispela projek we nau i kamap tru bihain long planti yia.

Em i askim ol pipel long kisim na lukautim gut dispela projek.

Projek bai stat long pinis bilong mun Septemba 2020 na  pinis long Disemba 2021.

Kontrakta Voltron Engineering and Construction Ltd bai go pas long namba wan hap bilong projek.