OL pipel long rurel eria bilong Papua Niugini bai painim hat tru long   kisim Smol Midiem Entaprais (SME) fanding long distrik bilong ol.

Wanpela komyuniti lida bilong Gogodala traib bilong Middle Fly distrik insait long Westen provins, Mista Vele Udili i mekim dispela toktok.

Em i tok Balimo taun i no gat benk ejensi olsem BSP na NDB long eksesim ol SME fanding.

Mista Udili i tok Balimo taun em i Hetkwata bilong Middle Fly distrik tasol i no gat planti besik sevis long dispela ilektoret.

Em i tok tu olsem i no gat wanpela gutpela tok klia o awenes i kamap long distrik opis na ol pipel i paul i stap.

“Mipela i harim long redio na ritim long niuspepa olsem ol fanding bilong ol distrik insait long kantri bai i go long dispela tupela benk ejensi. Em i wok bilong distrik MP long sanapim ol dispela benk ejensi sapos i no gat long ilektoret bilong em.

“Tasol i kam inap nau, i nogat wanpela samting i kamap yet,” em i tok.

Mista Udili i tok bikpela hevi tu i stap long distrik we i no gat benk, sampela helt senta i no gat marasin na skul i pas namel long yia bikos no gat mani inap long ranim skul na sampela besik sevis olsem infrastraksa na komyunikesen i no ran gut.

Em i singaut long Middle Fly distrik MP Roy Biyama long lukluk na stretim hariap ol dispela SME projek fanding bilong helpim ol rurel pipel bilong distrik.

Joseph Dawai i raitim