LONG Mande 21, Septemba 2020, IRC i bin sainim Memorandum Ov Understanding (MoU) wantaim Westen Hailans Provinsal gavman.

Astingting bilong dispela wokbung o patnasip em long helpim Westen Hailans Provins (WHP) long wok wantaim IRC na go het long bringim moa mani i go long provins.

Edministreta bilong Westen Hailans Provins, Joseph Neng wantaim Deputi Kopret sevis, Knox Kiap i bin makim Westen Hailans Provinsal Edministresen na ol i kam daun long Mosbi long sainim dispela agrimen wantaim IRC.

Komisina Jenerel bilong IRC,  Sam Koim i tok tenkyu long Mista Neng husat i makim Provins, long wokbung wantaim long sainim dispela MoU.

WHP na IRC bai go het long wokbung wantaim long bringim moa mani bilong kamapim moa divelopmen insait long provins.

Mista Koim i tok long dispela takis we IRC i kisim long provins, em i laik lukim 60 pesen bilong mani i go bek long ol pipel. Dispela em strongpela toktok em i mekim i go long Westen Hailans Provinsal gavman.

“IRC i laik lukim sevis i go bek long ol pipel husat i save baim takis,” Mista Koim i tok.

“Westen Hailans em i senta we olgeta Hailans provins i save mekim bisnis  bilong ol. IRC i laik apim takis antap long Hailans rijon, na dispela patnasip bai helpim mipela long mekim dispela i kamap tru,” Mista Koim i tok.

Em i tok moa olsem, IRC bai mekim wanpela awenes long Hailans bilong helpim ol manmeri  i kamapim gut wok bisnis bilong ol.

Em i tok awenes bai skulim ol pipel long rot bilong mekim bisnis na long putim rekot  bilong mani. Na tu long rot bilong yusim bisnis mani na mani bilong yu yet.

Mista Neng i tok tenkyu tru long Sam Koim long sapot bilong em na em i tok tupela  bai go het long wok wantaim long apim bisnis long Westen Provins.

Em askim olgeta manmeri long rejistaim ol bisnis bilong ol na baim takis.

Carolyne Ketsimur i raitim