CASA (Civil Aviation Safety Authority) wantaim IRC (Internal Revenue Commission) i bin sainim MoU olsem wanpela gol bilong gavman long wok wantaim na serim infomesen insait long ol gavman wokples.

Dispela MoU bai kamapim sans bilong IRC long kisim  ol data na komplaens wok insait long sekta.

Na moa yet long em, bai wok  i ken ran gut taim tupela dipatmen i serim infomesen na data i go i kam.

IRC Komisina Jenerel Sam Koim i tok dispela wokbung wantaim CASA em i impoten long kisim moa infomesen long rejistresen bilong ol balus na husat i papa bilong balus.

Em i tok CASA em i liklik indastri tasol wantaim bikpela kapitol bisnis bilong en, bai e mi spendim planti mani . Olsem na dispela patnasip bai helpim IRC long skelim ol Aviesen bisnis na harim tok long baim takis.

“Mipela i laik helpim tu long mekim  awenes  long rot bilong baim takis long dispela patnasip,” Mista Koim i tok.

Dairekta bilong CASA Wilson Sagati i tok amamas long IRC long dispela wokbung. Em i tok  patnasip bai helpim kampani long stretim ol hevi em i gat wantaim takis.

“ Taim mipela i sainim dispela patnasip, mipela i luksave long bikpela  wok bilong mipela olsem CASA na IRC. Mipela i amamas long kamapim wanbel na gutpela wokbung wantaim na serim tingting wantaim narapela,” Sagati i tok.

Long wankain taim tu, Mista Sagati i bin givim Komisina Jenerel Sam Koim Hom Onasip Skim plen bilong CASA na em i tok dispela plen i pulim ol manmeri kam long kampani.

Carolyne Ketsimur i raitim