SEVINGS kalsa o pasin bilong sevim mani na yusim long bihain taim i bikpela samting.

Dispela em wanpela strongpela salens em wanpela senia Fainensel Literesi Trena bilong Benk Saut Pasifik (BSP), Gaudi Manu i tokaut long en.

Mista Manu i tok planti manmeri taim ol i lukim planti mani long han i save amamas na laik yusim olgeta long nau tasol na i no save tingting long bihain taim.

Taim ol i mekim olsem na taim bikpela hevi i kamap, ol i paul na i no save long rot ol bai kisim mani long helpim ol yet.

Ol i save askim long wanpela birua man nem bilong en i stat long leta ‘D’…..Dispela em ‘Dinau’.

Manu wantaim tim bilong em long BSP Madang brens tim i bin go mekim ol fainensel litresi trening skul long planti ol rurel ples long Bogia, Sumkar, Madang na Raikos distrik long helpim ol rurel pipel long save moa long rot bilong sevim mani na yusim gut mani bihainim baset.

Long las wik antap Manu wantaim tim bilong em i bin givim skul long ol sios lain bilong tripela jon long Raikos distrik em Siroi, Bugati na Marika.

Em i tok taim ol manmeri i gat planti mani, ol i mas tingim wanem samting i bikpela long baim na wanem samting i nogat.

Em i tok long dispela rot, ol bai gat hap mani i stap yet na ol i ken sevim.

Dispela em bikpela salens planti manmeri long rurel eria long Madang i no save na ol i yusim nating ol mani.

Ol 8-pela rot bilong kamapim na bihainim baset em:

• Namba wan em long setim o mekim kamap wanpela fainensel as tingting o wok mak bilong yu;
• Namba tu em long luksave long menesmen bilong mani ol i kisim;
• Namba tri wokim kamap baset o mani-plen;
• Namba foa em long wokim plen long rot ol bai mekim disisen long yusim mani;
• Namba faiv bihainim stret baset plen na no ken yusim mani ausait long mani plen;
• No ken yusim mani long ol samting we i kamap nating na i no stap long baset plen; na
• Kamapim mani rekot o ripot bilong mani.

Manu i tok ol manmeri i no ken tingting tumas long yusim mani long baim kaikai na ol samting we i no save stap longpela taim.

James G. Kila i raitim