PLANTI gutpela divelopmen i wok long kamap long Yangoru Sausia Distrik long Is Sepik Provins we i mekim ol i pipel i amamas.

Las wik CEO bilong Pipel’s Microbank (PMBL) Anthony Dela Cruz i go lukluk raun long Yangoru long mekim wok redi bilong PMBL bai sanapim brens bilong en long hap.

Wok  bilong sanapim benk bai stat long wik i kam na dispela brens bai stap long hap BSP brens i bin stap long en. Long las mun BSP i bin opim nupela brens bilong en.

Dispela em namba tu benk nau long Yangoru.

Ol pipel i amamas bikos ol i ken yusim PMBL kat long BSP ATM na kisim mani.

Benk bai givim diposit pepa wantaim ol narapela prodak na tu givim dinau long ol meri na yut husat i laik mekim SME bisnis.

PMBL bai menesim Distrik Kredit Skim bilong kakaruk na kakao fama aninit long MOU we  Distrik Divelopmen Atoriti ( DDA) bai sainim long wik i kam.

Tupela benk bai wok gut wantaim long givim gutpela sevis long ol pipel bilong Yangoru.

Ol pipel long distrik i amamas olsem ples i wok long senis na ikonomi i wok long kamap strong na ol i tok bikpela tenkyu long Memba Richard Maru long gutpela wok bilong em long senisim ples.