PRAIM Minista James Marape i tok gavman i laik givim gutpela sapot long liklik i go long namel sais bisnis (SME).

Em i tok ol gavman bilong bipo i givim liklik sapot tasol wantaim gavman bilong em, dispela bai 150 pesen moa sapot long program.

Em i mekim dispela tok long bekim askim bilong Memba bilong Mosbi Not Wes long Palamen long Tunde as gavman i givim K100 milien long Benk Saut Pasifik (BSP) na K50 milien tasol long Nesenel Divelopmen Benk (NDB).

Mista i mekim dispela askim bikos em i tok BSP i komasel benk na bai sasim win mani (intres) long ol mani em i givim taim NDB i benk bilong gavman na i stap bilong helpim ol manmeri taim ol i laik kamapim wok bisnis bilong ol.

“Gavman i givim dispela mani long benk bikos i no olgeta man bai go insait long wok egrikalsa long wok bisnis. Nogat,” Marape i tok.

“I gat ol arapela bisnis ol lokal manmeri i save mekim na long dispela gavman i givim mani long BSP.

“Ol i ken kisim mani long NDB long mekim egrikalsa wok na ol i ken kisim mani long BSP tai mol i laik mekim ol arapela SME wok.

Marape i tok ol gavman nau i apim mak bilong sapot long K50 milien i go long K200 milien.

Em i tok Intares bilong 6.5 pesen long K50 milien nau i kamdaun long 4 pesen long K200 milien sapot.

“Ol manmeri i mas isi long kisim dispela dinau na i no ken painim hat.

“Dispela em soft dinau mani na manmeri i ken bekim dispela mani bihain long 20 yia.”

Em i tok olgeta Papua Niugini sitisen i kwalifai long aplai na kisim mani long benk long kamapim wok SME wok.

I gat spesel alokesen i go long sapotim ol mama na ol yangpela meri long statim wok bilong ol.

Em i tok i gat 10 pesen bilong SME mani i go tu long sapotim ol lain long Atonomus Rijen bilong Bogenvil long ol liklik manmeri long hap i ken statim wok bilong ol.