LONG statim bisnis, yu mas smat long yusim save bilong yu.

Traim long tingim olgeta rot we yu ken bihainim long mekim bisnis.

Wanpela bisnisman long Buka i bin kamap wantaim gutpela tingting tru na yusim bot bilong em bilong huk long karim ol kar kalapim Buka basis long Bogenvil.

Tamaro Foods long Buka i papa long dispela bot. Ol i bin baim tupela bot bilong hukim pis, tasol wanpela tasol i kamap pinis, narapela i no kamap yet.

 Long taim ol i wok long wetim narapela bot long kamap, ol i kisim tingting bilong trenspotim ol kar i go kam long Buka basis.

Vella Gail em nem bilong dispela bot. Tamaro Food i bin baim long Cairns long Australia long yia 2019.

Supavaisa bilong Tamaro Food Philip Sania i tok taim ol i bin baim dispela bot, ol kru bilong ol yet long Australia i bin sel wantaim bot i go long Bogenvil.

Ol sas bilong bot em, K290 long ol liklik kar, K800 long ol trak we i no karim kako na K1400 long kar na trak i karim kako.

Mista Sania i tok, COVID-19 i daunim liklik rAn bilong bisnis bikos long SOE we pasim ol manmeri long muv i go kam.

Vella Gail i gat 5-pela kru memba. Skipa wantaim asisten bilong em na 3-pela kru memba.

Inap namba tu bot i kamap, bai Tamari Food i pasim bisnis na salim tupela bot i go hukim pis.