SEPTEMBA namba 2 em de we olgeta kantri i save amamasim kokonas indastri.

Bikpela astingting bilong yia 2020 em “Inves long kokonas long sevim wol”. Dispela tim i toktok long wok bilong kokonas na ol prodak bilong en long ikonomik, helt, sosol, kalsarel na envairomen sekta.

Bod na Menesmen bilong Kokonas Indastri Koperesen (KIK) i bin wokbung wantaim ol narapela  22 International Coconut Community (ICC) memba long redim selebresen bilong Wol Kokonas De tasol  bikos long  COVID-19 dispela selebresen i no bin kamap.

Long makim gavman bilong PNG, KIK Bod na Menesmen i tok amamas  long olgeta stekholda long kokonas indastri long luksave long veliu bilong kokonas na go het long sapotim indastri.

Kokonas  i gat planti yus bilong em, na planti save kolim long “tree of life” (diwai bilong laip).

Ol narapela kantri i save baim mit bilong kokonas, wara bilong en, sel bilong en na skin bilong em wantaim.

Moa long 90 kantri i save planim kokonas na i save kamapim 69 milien kokonas long wanpela yia.

Moa long 110 kantri i save baim kokonas.  Long 2019 veliu bilong kokonas i bin  inap long 11.6 bilien.

Nau ICC i lukluk long impruvim wok bilong groim  moa kokonas.

Intanesenel Coconut Community (ICC) bai impruvim rot bilong groim kokonas long apim prodaksen. Na tu promotim kainkain prodak bilong kokonas na painim gutpela maket.

Maket bilong kokonas i wok long go antap na dispela em gutpela sain long ikonomi bilong kantri.

Long makim dispela impoten de, ICC i tok amamas long olgeta manmeri long kantri long dispela “World Coconut Day” 2020.