OL kastoma bilong East Street Fitness (EST) nau i ken baim ol fitness na trening ikwipmen onlain wantaim Benk ov South Pacific (BSP).

Taim dispela bisnis i bin stat long 2018, em i bin gat driman long  helpim ol kastoma na kamap olsem wanpela bikpela fitnes stoa we olgeta i ken go long en na baim ol fitnes ikwipmen bilong trening.

Nau em i kamap olsem studio jim we i save op long 24 aua na i gat moa long 50 klaens.

Dairekta bilong EST William Moaina i tok EST i redi long helpim ol kastoma bilong em long kamap fit na helti na luk gut.

“Mipela i speselais long givim trening bilong boksasais, weit trening, TRX na seket trening na rot bilong kaikai gutpela kaikai long rait taim.

Wantaim nupela websait, EST i bin askim BSP long  helpim ol long rejista long onlain peimen. Bai ol kastoma i ken isi long baim ol prodak bilong ol.

Onlain peimen i save mekim isi long ol kastoma long baim samting, bikos nau olgeta samting i stap onlain.

William i askim olgeta bisnis tu i mas rejista long onlain peimen bikos em i mekim wok isi na seif.

Carolyne Ketsimur i raitim