LONG Mun Julai, Nesenel Minista bilong Plening na Monitoring na memba bilong Bulolo Sam Basil i bin mekim wanpela lukluk raun long Atonomus Rijon bilong Bogenvil bihainim singaut bilong Minista bilong Infomesen Komyunikesen na Teknoloji na Memba bilong Saut Bogenvil Timothy Masiu.

Dispela i bin namba wantaim bilong Minista Basil long kam long Bogenvil. Minista na ol lain bilong em i bin kam long Buka long balus na bihain kisim helikopta i go olgeta long Buin long Saut Bogenvil. Minista Basil i bin tok olsem em i save ting olsem Bogenvil em wanpela liklik ailan tasol na i no wanpela bikpela ailan wantaim ol bikpela maunten.

Long dispela raun bilong em Minista Basil i bin stap insait long seremoni bilong brukim graun bilong wokim nupela Buin Intenesenel Maket we gavman bai wokim long mani mak inap long K5milien, na tu em bin lonsim Saut Bogenvil 5-yia Divelopmen Plen.

Bihain long dispela, Minista na ol lain bilong em i bin go long Sovele long Bana Distrik we em i bin lonsim Bana Special Economic Zone (SEZ).

Bana em wanpela long ol foapela distrik long Saut Bogenvil. Ol narapela em; Buin, Siwai na Torokina.

Long taim bilong lonsim dispela SEZ, Minista Basil i bin tok strong olsem ikonomik divelopmen em mas kamap wanpela namba wan praioriti bilong gavman bilong Bogenvil, na gavman i mas painim planti moa rot bilong kisim mani bilong mekim ol wok kamap bilong helpim ol pipel bilong em.

Em i tok moa olsem, nesenel gavman i bilip olsem SEZ em wanpela gutpela rot bilong kism ol foren invesmen na kamapim moa wok bilong ol pipel bilong yumi.

“Bana em wanpela long ol Special Economic Zones em gavman i laik kirapim long PNG”

Minista Basil i tokaut tu olsem, ol narapela em long; Sepik Special Economic Zone long Is Sepik Provins, Manus Provins, Nadzab long Morobe Provins, na Kikori long Galp Provins.

Minista Basil i tok promis olsem em bai wokbung wantaim Masiu long lukim olsem Nesenel Gavman i putim dispela projek long Gazatte, na em bai kamap olsem wanpela wok bilong gavman bilong PNG.

Em i bin askim strong tu  Minista Masiu long wok wantaim ol lain bilong Bana opis bilong NID long stretim ol samting olsem rejistresen bilong ol papa na mama graun.

Paul Wagum i raitim