PAPUA Niugini i go insait pinis long  agrimen  bilong mekim haidro pawa  wantaim  wanpela  Maining kampani bilong Australia.

Praim Minista James Marape i bin sainim dispela agrimen wantaim Siaman bilong Fortescue Metal Group bilong Australia, Andrew Forrest long Pot Mosbi.

Fortescue em i ASX kampani we i save mekim wok eksploresen  bilong  ain long Westen Australia.

PM Marape i tok, dispela agrimen bai bringim ol gutpela invesmen long haidro-ilektrik pawa long PNG.

Tasol toktok bilong em i no givim moa infomesen long wanem samting bai kamap long taim bihain bilong dispela haidro projek.

Em i tok ol stadi bilong go hetim wok bai stat long eria we haidro projek bai kamap long en.

Dispela patnasip bai helpim kantri long sait bilong konsamsen na intanesenel maket.

“Gavman i toktok wantaim ol gutpela intenesenel investa  husat i laik wok wantaim mipela na divelopim ol risos bilong mipela,” Marape i tok.

“Agrimen wantaim Fortescue em i wanpela gutpela sans long kamapim gut kantri bilong yumi,” em i tok.

PM i tok, PNG i gat sans nau long kamapim planti wok  bilong ol pipel na bilong ol jeneresen bilong taim bihain. Na tu bai impruvim revenyu bilong lokal na nesenel gavman.

Minista bilong PNG State Enterprise Sasindran Muthuvel i bin mekim bikpela wok long kisim Fortescue kam long PNG.