Barrick Niugini Limited (BNL) bai i salensim gen disisen bilong kot long rausim aplikesen bilong em long kot i lukluk long disisen bilong gavman long no ken surikim Porgera Spesel Maining Lis.

BNL i no wanbel long planti hap insait long disisen we Deputi Sif Jastis Ambeng Kandakasi i bin go pas long en long rausim aplikesen bilong em long kot.

BNL i tok kot i no bin skelim gut olgeta tok BNL i bin putim insait long aplikesen bilong en long kot i rivium disisen bilong gavman.

Long dispela taim tu ol pipel long Porgera i singaut long Praim Minista James Marape i mas go na bung wantaim ol na stretim toktok bilong opim main gen.

Sampela i no amamas olsem gavman i givim laisens bilong operet i go long Kumul Minerals Holdings Limited (KMHL) na i no Barrick Niugini.

Praim Minista Marape i tok em bai i go bung wantaim ol pipel long Porgera.

Em I tok tu olsem ol klostu taim bai gavman i senisim olgeta bod memba bilong Kumul Minerals Holding na mekim Enga Provinsel gavman i kamap sabsidieri bilong Porgera Main na ol pipel na gavman bai i wok bung wantaim ol pipel.

Praim Minista Marape i bin mekim ol dispela toktok long palamen long las wik.