OLSEM sumatin em i impoten long i gat ol buk, pen na rula tasol bikpela samting long helpim lainim bilong sumatin em long i gat tisa i pas tru long wok bilong em na gutpela envairomen bilong lainim.

I no longtaim i go pinis balus bilong mipela long Goroka i karim 3 tan skul metirel i go long sampela rimot ples. Taim em i kam bek dispela MAF Caravan i pulap tru long ol fres pinat bilong salim long maket.

 Planti taim MAF balus i save karim ol metirel bilong bildim klasrum na haus tisa long helpim ol komyuniti long inves long ol infrastraksa bilong ol skul bilong ol.

Em i impoten tru long bildim wanpela hai skul long wanpela namel ples long helpim long bildim na strongim neks jeneresen. Laip i save hat long ol yangpela sumatin taim ol i bikpela long wanpela rimot ples na taim ol i laik go long hai skul ol i mas lusim ples na go stap boding long skul o wantaim ol wanpisin famili inap wanpela yia olgeta.

Skul fi na ol arapela kost bilong helpim yangpela i stap long skul i save kamap bikpela salens bilong ol famili husat i save salim pikinini i go skul long longwe ples.

 Kirapim wanpela lokal hai skul em i wanpela gutpela na stretpela invesmen. Em bai i helpim pikinini long pinisim gret 9 na 10 na kamap strong bipo long ol i kisim balus i go long ol bikpela siti long pinisim gret 11 na 12 skul bilong ol. MAF em i amamas long helpim long kirapim ol hai skul long ples!

 Planti taim dispela ol rimot hai skul em ol boding skul. Dispela i min tu olsem i gat sampela nid bilong moa kaikai insait long ol ples. I no longtaim i go pinis balus bilong mipela long Wewak i karim 600 kilogrem rais i go long wanpela rimot ples long Wes Sepik Provins.

 Dispela skul i stap long wanpela ples we i hat long go long en insait long ol maunten. Gutpela tru olsem skul ya i stap long wanpela ples we graun bilong em i ris tru na i gat planti kaukau na kumu. Long givim kaikai long 300 sumatin long dispela skul em i nidim wan na hap tan kaukau na bikpela saplai bilong kumu long olgeta wik long wanem olgeta sumatin i save boding long skul ya. Dispela em i planti kaikai tru long skul yet na ol lokal komyuniti long kamapim insait long wanpela wik.

Long narapela ran bilong MAF balus em i bin karim 120kg bek flaua. Wanpela tisa i bin raitim wanpela pas na i tok: “Em i hat nau long painim inap kaukau. Flaua i min mipela i ken kukim bans long moning na rais i save helpim long daunim hevi bilong nogat inap kaukau. Ol arapela skul i pas pinis long wanem ol i no gat kaikai. Olsem na em i gutpela tru MAF i helpim mipela tude.”

Long Westen Provins i no longtaim i go pinis 40 sumatin long wanpela rimot hai skul i amamas tru long kisim Buk Baibel.

Narapela taim bai mipela i karim moa Buk Baibel long wanem i no olgeta lain i gat Buk Baibel yet.

Planti taim Baibel bokis we ol pailot bilong mipela i save karim em i wanpela rot tasol bilong ol pipel long baim na holim tok bilong God. I no gat buk stua long ol ples ya na intanet tu i no gat long ol i ken kisim tok bilong God. Tenkyu tru long ol dona ovasis na CRMF ol pipel i ken gat sans long kisim na holim wanpela Buk Baibel bilong ol yet. Ol kost em i daun tru long wanem mipela i helpim wantaim sampela kost.