TAIM Ok Tedi i bin ripotim 7-pela COVID-19 keis long namba 5 Ogas 2020, kampani i bin pasim nomol operesen na i bin wok long mekm kontek tresing, testing na aisolesen long main sait.

Ol i bin kisim sempol insait long dispela  7-pela ripot keis ol i bin salim i go long Australia bilong testim.

Ol risalt i kam bek na soim olsem  i gat 37 nupela keis, 298 i negetiv na 6-pela i no kisim risalt yet.

Long taim em i givim toktok bilong em long ol dispela risalt, OTML Menesing Dairekta na CEO, Musje Werror i tok ol positiv keis i givim konsen olsem sik i wok long kalap long komyuniti.

“Helt na seifti bilong ol wokmanmeri, famili, kontrakta na komyuniti em i bikpela samting na yumi mas go het long mekim COVID-19 Menesmen Rispons Program long pasim dispela sik long kalap long ol narapela,” Mista Werror i tok.

Kampani i tokaut moa olsem, long 37 nupela keis, 21 em ol lain husat i stap long singel rum kem na 16 i stap wantaim ol famili long ol haus bilong kampani.

Ol lain husat i positiv i stap nau long aisolesen na ol kontek bilong ol i stap long kwarentin na mekim test nau.

Operesen long OTML i pas yet na bai op bek bihain long ol i kisim risalt bilong test program. Kampani bai mekim namba tu  raun test bilong em klostu taim.

Carolyne Ketsimur i raitim