PNG Chamber of Mines and Petroleum i bin holim namba wan miting bilong ol las wik long givim apdeit bilong risos sekta na long plen bilong em long wok insait long nu nomol.

Long dispela bung, ol i bin toktok  long kamapim ol rot bilong gavman na maining  indastri long wok bung wantaim long taim bilong ol nupela senis we i  kamap long Maining na Wel na Ges ekt na ol narapela senis we gavman i putim long Ogenik Lo long ol risos.

Miting i bin kamap namel long PNG na Australia.  Gerea Aopi bilong PNG Chamber of Mines and Petroleum i bin opim dispela miting.

“Posisen bilong Chamber long senisim lo i no senis. Mipela i tok orait long gavman long lukluk long  ol polisi na lejislesen  na lo bilong ol risos. Bikpela samting em konsaltetiv proses bilong indastri i mas orait, i op na i klia,” Mista Aopi i tok.

“Mipela i laik sanap strong na wok wantaim gavman long ol lejisletiv rifom. Em bai wokbung bilong mipela olsem konsaltetiv patnasip,” em i tok.

Minista bilong Petroleum na Eneji, Kerenga Kua i  tok tenkyu long Chamber long singautim em i kam na tokaut gut long  tingting bilong Marape-Steven gavman long dispela forum lejislesen.

“Astingting bilong wanem na gavman i laik mekim dispela lejisletiv rifom o senisim ol lo bilong maining na petroleum em bikos mipela i ting i gat sampela lo bilong maining we i no wok long helpim kantri,” Mista Kua i tok.

Bihain long Minista Kua  i mekim toktok bilong em, sampela ol spika bilong PNG na Brisbane i givim ol ligel na fainensel tingting bilong ol long sampela senis we Minista Kua i bin mekim.

“Bikpela samting em yumi mas save gut long tingting bilong gavman, indastri na investa long  karimaut gut wok bilong helpim ikonomi bilong PNG na ol pipel na kamapim gutpela  hap bilong invest,” Mista John Chambers husat i bin go pas long miting i tok.

Mista Wapu Sonk husat i makim Kumul Petroleum Holdings na Augustine Mano long Mineral Resource Development Corporation ( MRDC) i bin givim tu ol tingting bilong ol long dispela senis.

Carolyne Ketsimur i raitim