“BUIN Intanesenel Maket bai kostim K5.9 milien na bai napim moa long 100 maket manmeri long
salim salim samting.

Em bai kamap bikpela maket long Bogenvil bikos bai sevim ol pipel bilong
Bogenvil na Solomon Ailans,”
Minista bilong Komyunikesen na Infomesen na Memba bilong Saut Bogenvil Timothy Masiu i tok em
i les pinis long lukim ol mama i sindaun long graun na salim ol kaikai bilong ol.
“Taim mi bin stap long skul, mi save kam long dispela maket long baim kaikai. Na mi lukim i no gat
senis i kamap, olsem na nau mi laik senisim bai kamap narakain long Buka na Arawa maket,” Mista
Masiu i tok.
Em i tok, nau em taim bilong mekim dispela senis na pasim maus bilong ol pipel husat i save askim
planti long wanem taim bai dispela maket i kamap gut.
“Yumi mas gat gutpela maket na divelopim ol taun bilong yumi. Mi tok tenkyu long ol papagraun
long serim dispela graun na blesim ol narapela pipel husat i ken kam na salim ol kaikai bilong ol,”
Mista Masiu i tok.
Minista Masiu i tok em i putim K1 milien pinis we i stap nau long Distrik Tresari Akaun na i redi long
yusim long statim konstraksen.
Tenda bai go aut klostu taim bai ol kontrakta i ken aplai.
“Yumi mas wok wantaim long kamapim gut maket bilong yumi. Maket bai gat pablik toilet, polis
stesin, storij seksen na liklik hausik. Dispela em i driman bilong me na mi amamas Minista Sam Basil i
sapotim mi,” Em i tok.
Minista bilong plening Sam Basil i bin amamas long kamap hap bilong brukim graun seremoni, na em
i tokim ol pipel long Buin olsem Buin maket i stap long Nesenel baset.
Tupela Minista bai wok wantaim na pinisim long yia 22.

Carolyne Ketsimur i raitim