OL PNG sip ona i lukluk long strongim na kamapim gut sevis bilong ol.

Asosiesen i gat nupela ekseketiv na ol strongpela kampani husat i kamap nupela memba.

Na ol i wok long mepim plen bilong kamapim  gutpela na namba wan domestick siping indastri.

Kostal siping em i bikpela na impoten samting tru long divelopmen bilong PNG. Dispela bikos PNG i gat planti liklik ailan  na nambis.

Eiti pesen bilong ol ples long PNG i stap long nambis.

Siping Indastri i impoten bikos PNG i nogat inap rot netwok na fea bilong baim balus long karim kago em i antap tru.

Nupela Siaman bilong Asosiesen, Menesing  Dairekta bilong Pasifik Projek Lojistik, James Midgley i toktok strong long impotens bilong kostal siping.

“Mipela i no save givim sevis tasol long ol pipel, bisnis na gavman. Mipela i save givim wok na trening long planti manmeri long Papua Niugini tu. Na moa yet long dispela taim nogut bilong COVID-19, indastri i mekim bikpela wok long karim kaikai, marasin, medikol ikwipmen na PPE,” Em i tok.

Ol memba bilong 2020 i makim olgeta sip long siping indastri. Agmark, Coastal Shipping Company, Consort Express Lines, Ok Tedi Mining, Pacific Projek Logistics, Pacific Towing, P&O Maritime, R&A Marine Services, Smit Lamnalco, South Sea Lines na Svitzer em olgeta memba bilong siping indastri.

“Mipela i lukluk long kisim na wok wantaim sampela institiusen bilong gavman olsem Nesenel Maritime Safety Authority, Dipatmen bilong Trenspot, Dipatmen bilong Haia Edukesen, Risets, Sains na Teknoloji na PNG Ports,” Asosiesen Vais Siaman na Jenerel Menesa bilong Pasifik Towing, Niel Papenfus i tok.

PNG kostal sip ona asosiesen i op long husat i laik kamap memba. Long save moa gut long asosien salim toktok long This email address is being protected from spambots. You need JavaScript enabled to view it.

Carolyne Ketsimur i raitim