AIR Niugini i  go het yet long givim luksave long ol wokmanmer bilong en.

Ol dispela wokmanmeri i save bungim tingting na givim long Smart Ideas Kempein.

Dispela kempein em i hap bilong Haia Altitude Program we i lukluk long daunim kost na mekim moa mani bilong kirapim gutpela wokples na amamasim ol kastoma.

Foapela wokmanmeri long kain kain dipatmen insait long kampani ol kisim luksave las wik. Kampani i luksave long ol tingting na wok bilong ol stat long mun Janueri i kam long Mei 2020.

Sampela i kisim tok tenkyu na amamas long gutpela kontribiusen bilong ol tu.

Kampani i lukluk long wok bilong  trekim na monitorim balus, pawa unit bilong Boeng balus taim em i kamap long ples balus na long ol diskaon fea klas bilong domestik flait.

“Mipela i lukluk long mekim moa entri long dispela yia na mipela askim olgeta wokmanmeri long go het long bungim tingting long dispela program. Yupela olgeta em strong bilong kampani na mi tok tenkyu long yupela long bringim ol gutpela tingting na hatwok i kam long dispela program,” Program Kodineta bilong Air Niugini, Tasha Tukana i tok.

Ol wina i bin kisim ol vausa bilong soping wantaim ol soklet, kopi, wain glas, kopi kap na sampela arapela samting.

Ol wokman meri i save givim ol tingting bilong ol long wanpela komiti long olgeta mun. Na komiti i save skelim ol na kisim tingting bilong husat i gutpela moa.

Smart Ideas Kempein i save helpim ol wokmanmeri tu long tingting gut na bungim ol tingting long helpim kampani.