KINA Benk na NiuPay i amamas long tokaut long dijitol patnasip namel long tupela kampani las wik.

Dispela patnasip bai helpim na kamapim gutpela sevis long PNG maket.

Lonsing i bin kamap long Kina Benk Haus long Pot Mosbi.

“Kina Benk i sanap strong long sapotim na kamapim gut  taim bihain bilong  Papua Niugini olsem na mipela i gat bilip long divelopim e-komes long helpim kantri i kamap gut. Long strongim dispela tingting, Kina Benk i patna wantaim lokal kampani NiuPay,” Kina Ekseketiv Opisa Greg Pawson i tok.

Niupay em i namba wan kampani bilong Papua Niugini long givim onlain, fainensel teknoloji solusen long gavman na ol praivet bisnis. Ol aplikesen na infrastraksa bilong ol bai helpim ol bisnis long abrusim ol salens bilong Papua Niugini dijitol lenskep.

Dispela bai helpim kantri tu long taim bilong COVID-19 we bai afektim gavman na ol bisnis.

Long taim em i bekim ol askim bilong dispela patnasip, Dairekta bilong Niupay James Inglis  i tok,

“Em i gutpela Niupay i pantna wantaim Kina Benk bikos tupela i gat driman long kamapim gut peimen sistem long Papua Niugini.”

Tupela kampani i bilip olsem dijitol wokbung  bai kamapim gut rot bilong baim samting long Papua Niugini.

Dispela nupela patnasip bai helpim ol kastoma long gat isi, na seif rot we bai hariapim pasin bilong baim prodak na sevis long Papua Niugini.

Carolyne Ketsimur i raitim