Konstitusenol na Lo Rifom Komisin (CLRC) i pinisim laspela ripot bilong riviu o lukluk bek long ol lo bilong siti plening na eben divelopmen long givim long gavman long mun Novemba.

Dispela i kamap bihain long ol ki gavman stekholda i lukim ol draf ripot bilong dispela riviu long wanpela kibung long Pot Mosbi i no long taim i go pinis.

CLRC Seketeri Dokta Mange Matui i tokim ol stekholda na ol lain i kam long dispela kibung olsem dispela kibung em i las proses bilong pinisim dispela riviu.

As tingting bilong dispela riviu em long lukluk long tripela samting. Namba wan em rilesensip bilong eben lokal gavman na provinsal gavman aninit long Ogenik Lo bilong Provinsal Gavman na Lokal-level Gavman (OLPGLLG) 1995. Namba tu em Infomol Sekta Developmen na Kontrol Ekt 2004 na olsem wanem dispela i save helpim o bagarapim ikonomi na menesmen bilong ol siti na eben senta. Na namba tri em gutpela bilong Siti Ekt 1971 na ol arapela hevi na tu long givim sampela tingting long gavman.

Long dispela bung ol stekholda i lukim ol lo, ol polisi na ol edministretiv tingting we i kamap antap long ol wokpainimaut long ol 8-pela provins na ol sampela ejensi. Komisin bai lukluk tu long ol tingting we ol stekholda i givim long dispela bung na stretim gen ripot bipo long ol i givim i go long Palamen.

Dokta Matui i tok ol i no senisim ol lo yet. Em i tok dispela em i narapela proses we ol i bai kisim tingting bilong ol stekholda ken long putim long draf lo.

“Dispela ripot bai go long narapela proses na bil bai go ken long narapela proses na em bai kam ken long Stet Solisita long stretim,” Dokta Matui i tok.

Em i tok tenkyu long Nesenel Risets Institut (NRI), Nesenel Lends Komisin, NCDC na ol gavman dipatmen olsem Dipatmen bilong Jastis na Atoni Jeneral, Dipatmen ov Provinsal na Lokal Gavman Afes, Nesenel Plening, Lends na Fisikal Plening, Komyuniti Developmen, na Treseri long wok bilong ol long dispela riviu.